O Concello de Vilar de Barrio contabiliza preto de 20 quilómetros de pistas afectadas polos intensos episodios meteorolóxicos rexistrados en xaneiro e febreiro. Estas vías resultan estratéxicas para garantir o acceso a granxas e explotacións agrogandeiras —piar fundamental da economía local— e forman parte ademais do itinerario do Camiño de Santiago no seu trazado da Vía da Prata.

Vilar de Barrio, 26/02/2026

O Concello de Vilar de Barrio demanda apoio urxente ás administracións supramunicipais perante o grave deterioro da rede viaria provocado polas persistentes choivas dos dous últimos meses. Segundo as primeiras estimacións técnicas, preto da metade dos 37 quilómetros de pistas municipais da zona de A Veiga presentan danos estruturais, con perda de firme, arrastres e afeccións en cunetas e drenaxes. Estas infraestruturas resultan esenciais para garantir a conexión de explotacións agrícolas e gandeiras que vertebran o tecido produtivo do municipio.

O impacto transcende o ámbito estritamente agrario, xa que parte destes camiños coinciden co trazado do Camiño de Santiago na súa variante da Vía da Prata, o que engade unha dimensión patrimonial e turística á problemática.

O alcalde, Manuel Conde, subliñou a magnitude do reto financeiro ao que se enfronta o consistorio: “Aínda que para nós sexa prioritario, como concello non temos recursos para facer fronte a un investimento deste tipo que sería millonario”. Segundo os seus cálculos sería necesaria unha inversión que superaría o medio millón de euros, “se consideramos que 100 metros de reparación custarían ao redor de 3.000 euros, ¿canto custaría a recuperación dos máis de 20 quilómetros de pistas afectadas que temos na Veiga?”, pregúntase o rexedor.

Desde o goberno local insístese na necesidade de articular liñas extraordinarias de financiamento que permitan acometer unha intervención integral e sostible, garantindo a continuidade da actividade económica, a cohesión territorial e a adecuada conservación dun itinerario cultural de proxección internacional.

 Subvención executada polo Concello de Vilar de Barrio, ó  abeiro da Ordedo 29 de xaneiro de 2025 pola que se establecen as bases reguladoras para a concesión, en réxime de concorrencia non competitiva de axudas a entidades locais de Galicia para a aplicación de solucións baseadas na natureza orientadas á prevención de riscos asociados ao cambio climático en espazos urbanos e periurbanos (programa Galicia refuxio climático), e se convocan, mediante tramitación anticipada de gasto, para o ano 2025 (código de procedemento MT975Y), unha subvención para o proxecto consistente no incremento de biodiversidade urbana mediante a implantación de cubertas verdes, cuxo importe ascende á contía de 60.000,00 €.

Plans provinciais de cooperación para as obras e servizos municipais: Obras de señalización, Cabezal para desbrozadora, e honorarios de dirección.